انتخبنا الفاسد؟ وقاطعنا النزيه!!

كيف كانت الانتخابات في زمن الطاغية صدام حسين؟

بفترة التسعينات واعتقد سنة 1994 او 1995 ما أتذكر بالضبط أي سنة صارت انتخابات بالعراق وحسب ما والدي الله يحفظه كان يسولف ويگول هي مو انتخابات أصلا!.

 

آني صراحة بذاك الوقت جنت طالب ابتدائية وما اعرف هاي السوالف مال الانتخابات لكن بعدين من سقط الطاغية صدام ومن بده العالم يتطور وبدينه احنه نتطور وياه وبدينه نعرف الگوگل وبشنو نستفيد منه وكان وقت الانتخابات قريب والوالد متحضر من قبل يوم ويؤكد علينا شنو نشيل مستمسكات وشلون لازم نصوت ووين نخلي العلامات هنا صار عندي فضول ادخل للأنترنت وابحث عن الانتخابات شلون جانت بذاك الزمن التعيس التعبان.

هسه نرجع لانتخابات التسعينات ومن خلال النتائج اللي طلعها حجي گوگل تبين انه هاي الانتخابات هي بالأصل ما تعتبر بأي شكل من الأشكال انتخابات ولا بيها أي ضوابط أو قوانين دولية تخليها انتخابات! زين شنو يسموها لعد؟ يسموها يا معزوز السلامة استفتاء شعبي وعلى أساس چانت أول انتخابات رئاسية عراقية تصير بعد استلام صدام للحكم! وشلون اجه صدام للحكم؟ هنا يا اصدقائي وخصوصا الجيل اللي ما يعرف منو صدام حسين الله همه مواليد 2003 وانته صاعد أنصحك نصيحة أخوية بصفتك إنسان ما رح اكول دارس ومتعلم ومثقف لان هواي منكم ما صار الهم فرصة للدراسة ومعلوماته محدودة وهذا مو عيب لان ضروف الحياة تقهر اكبر طموح وتحطم اكبر معنويات, فأناشدكم تدخلون لليوتيوب او للكوكل أو ممكن تختصر الطريق وتدخل لأي تطبيق للذكاء الاصطناعي رح تشوف اكو علامة مثل تشبه الميكروفون تضغط عليها رح يطلعلك المساعد الصوتي وتكدر تسأله أي سؤال يخطر في بالك.

المهم نرجع لموضوعنا, هاي الانتخابات او الاستفتاء شنو يابه؟ الانتخابات عبارة عن ورقة يسلموها الك ميتعده حجمها ربع الورقة اللي يستخدموها أهل الاستنساخ ما بيها أي حزن ثاني أو مرشح كاتبيلك معلومات بسيطة مثل اسم المحافظة ورقم منطقة الاستفتاء والسؤال اللي حدد مصير العراق لـ 35 سنة هو "هل توافق على تولي صدام حسين منصب رئيس جمهورية العراق؟" وجواها حقلين نعم أو لا وسلامتكم, والصور جوة عينة من هذا الاستفتاء ومن اللي شاركوا بي.

ممكن لحد هنا نشوف المسألة طبيعية مجرد استفتاء صح مابي اي حزب ثاني او مرشح غير صدام بس هو هذا الوضع اللي جان الكل يعرفه واغلب الناس راحت صوتت حتى تخلص من السين والجيم!. بس اللي هو مو طبيعي انه اي شخص ما راح شارك من اللي كان عليه علامة استفهام (سجين, عنده سجين, متدين, يلتقي مع متدينين, عنده معدوم) او اي شي يخلي العيون توكع عليهن مختار المنطقة يدك الباب عليه كتحذير حته يروح يصوت واذا ما راح راح يجون عليه الرفاق حسب المنظمة الحزبية اللي بيها منطقة الاستفتاء, هنا راح تعرف انه انت ما ممكن ما تشارك او رح تخلي نفسك وعائلتك بموقف ما ممكن تطلع منه سالم.

وهواي اكو قصص من ناس ممكن يكونون اقاربكم او واحد من افراد عوائلكم عايشها ويكدر يسولف الكم شنو كانت هاي الاجواء الانتخابية الحرة الديمقراطية اللي المجتمع الدولي كله ما گدر يصدگ بيها لان جانت نسب التصويت توصل 99.6 او 99.7 ومو بس هاي كان توصل مراحل الرفاق يوكفون يمك يشوفوك شنو تنتخب وهنا انت رح تستوعب الفكرة وتأشر نعم.

ماذا بعد سقوط الطاغية؟ 

سقط الطاغية وتبدلت كل الاوضاع الخوف صار بدالة راحة واطمئنان وصار الكل اله حرية التعبير ويگدر ينتخب اللي يشوفه شريف ونزيه وگلبه محروك عالعراق وراحت الايام وراحت الشهور والسنين واللي چنه متأملين بي خير ما تحقق وتحول لساحة مليانة وفلوس وامتيازات مناصب الاحزاب كلها تتعارك حته تغرف من هاي الساحة وتعبي جيوبها بس ليش هيج صار؟

الاجابة كلش واضحة, لان ما گعدنا ويه نفسنا وفكرنه صوتنا شنو ممكن يسوي وما علمنه الاجيال اللي اجه وره 2003 شنو اللي عشناه قبل 2003 وشنو جانت حياتنه, لان اعتمدنا بالاختيار على مبدا الحكم چان للسنة وهسه نريدة للشيعة وهو مبدا صحيح لان بحكم الاغلبية تكون هالشي بس احنه اعتبرناه غنيمة ما ممكن نفرط بيها.

وتطور هذا الشي وصار ياخذ منافذ اكثر مثل الاحزاب وصارت تطلع الاحزاب وتطلع الشعارات وتجي انتخابات وتروح انتخابات وكل شء جديد ميصير ونظل نسب الحكومة ونلعن اليوم اللي راح بي هذاك الملعون لحد ما اجت ثورة تشرين اللي بيها طلع كل الشعب وانتفض وگال كلمته والمرجعية بخطبها ايدت هاي المظاهرات السلمية وبعدها اجت الانتخابات وشجعت المرجعية على المشاركة الفاعلة بهاي الانتخابات اللي هي الطريق الوحيد لانقاذ البلد وصعود الشرفاء ووصف محاربة الفساد اصعب من محاربة تنظيم داعش الارهابي.

وبسنة 2021 صارت انتخابات واللي بيها الكتلة الصدرية حصلت على 73 مقعد في حين چان تحالف التيار الصدري ويه الحزب الشيوعي وبعد كم حزب الهم بس 54 مقعد في انتخابات سنة 2018, والمستقلين حصلوا على 43 مقعد في حين چان الهم بس مقعدين بانتخابات 2018, ودولة القانون حصلوا على 33 مقعد في حين حصلوا على 25 مقعد بس في انتخابات سنة 2018, يعني تقريبا ربع عدد البرلمان همه من الكتلة الصدرية.

الرجوع الى الوراء 

وبسنة 2025 الصدر طلع وكال يابه اني بعد ما اشارك بالانتخابات يابه ليش؟ والله لان بعد ماكو فايدة بطريقة لو بثانية جاي يصعدون الفاسدين! زين مو ربع البرلمان همه ربعك ومنك وبيك هذولة كلهم فاسدين؟ لو جنت مخدوع بيهم و من عبرت الاربع سنوات عرفت بيهم مو كدها؟

المهم التيار الصدري بدل ما المفروض جان يشجع للانتخابات ويشجع اتباعة ينتخبون الشريف والنزيه قاطع الانتخابات مقاطعة كاملة والسيد مقتدى الصدر كال يابه اي واحد يرشح هذا اني متبرئ منه والاتباع ممنوع الواحد يطلع ينتخب وكلها علكت لافتات "مقاطعون".

 

وهنا احب اوجه لسماحة السيد مقتدى الصدر تساؤل وهو: "سيدنا بالدورة اللي راحت عدكم 73 مقعد يعني 73 نائب هذولة كلهم فاسدين؟" لان الحكومة تتشكل من خلال اكبر كتله وانتم جنتوا بيها يعني اذا فاسدين فبالتالي انتوا كلكم فاسدين.

خلي نفترض كلهم فاسدين زين ليش ما طلعت وحثيت اتباعك على انتخاب الناس النزيهه وماكو احد بالعراق ما يعرفله واحد نزيه وشريف ينتخبه لان لو خليت قلبت مو صحيح؟ صراحة قرار جان جدا مو بمحله لان هذا القرار خله 73 فاسد يصعد بدالكم تخيل مولاي انت ردت تصلح حال البلد لكن انت جنت سبب بانه مديت جذور مو طبيعية للفساد وما اعرف حنت دارس قرارك او لا؟

قرارك چان بمثابة حكم الاعدام على كل الناس الشريفة اللي نزلت بالانتخابات لان اكو هواي ناس نعرفهم وجان الهم دور مميز بالدورة السابقة ما گدروا يوصلون للاستحقاق بسبب نسبة المشاركة وبسبب القانون الخبيث اللي رجعوا بهاي الانتخابات لان عرفوا كلش زين شلون يخدمهم, وهاي النتيجة اللي الكل صار يعرفها انتخبنا الفاسدين دون قصد واعدمنا النزيهين بس شنو ممكن نكول غير الله يصلح حالنا ويصلح حالك ويخليك تراجع قراراتك الف مرة قب ما تتخذها ويا ريت لو تعرف حجم اتباعك وحجم تاثيرك بالشارع وشلون ممكن تحول هذا التاثير الى طريقة او سلاح او قوة او اي شي ممكن تسمي وبمساعدة الشرفاء وياك ماكو احد يكدر يوكف طريقكم وتكونون الشرارة الاولى اللي تحرك العراق الى التقدم وترجع سيادة البلد وهيبته بجهود الناس اللي تگعد ويه نفسها وتفكر من الاصلح ننتخب لخاطر العراق لو ندير ظهرنا اله ونخذله...ومن الله التوفيق