السيد محمد رضا يلبس قناع السيد السيستاني!!
ما هي قصة القناع؟
بيوم من الايام واني راجع من محافظة بغداد عاصمتنا الجميلة لتمشية معاملة من معاملات دوائرنا الموقرة لمحافظتي العزيزة وقريب من الطريق السريع الدولي, لمحت من بعيد رجال جبير بالعمر يطلع عمرة نهاية الخمسينات او نص الستينات واكف يأشر للسيارات بلكي احد يوكفله حتى يوصله لمنطقته, من وصلت قريب اله قررت اوكف اله لان محد وكف وأشوف وين يريد يروح حتى اذا على طريقي اشيله ويايه واذبة باقرب مكان اله.
المهم وكفت مسافة عنه وشغلت اربع اشارات دكيتله هورن ما انتبه فرجعت واني اتلفت يمنه ويسره لا تجي دورية مرور شي تشوفني واروح اتغرم, كولو وصلت يمه:
اني: الله يساعدك حجي
الحجي: حياك الله بوية كل الهلا
اني: حجي وين توصل؟
الحجي: انت منين طريقك حته ما ازاحمك؟
اني: لا العفو حجينا ماكو كل زحمة, وين تريد توصل؟
الحجي: اني اوصل لفلان منطقة, طريقك عليها؟
اني: اي حجي اني مار عليها اصعد.
الحجي: رحم الله والديك متفضل
اني: العفو حجي بخدمتك
ومن صعد الحجي كلي بوية وين ما يصيرلك مجال قريب على (فلان) منطقة نزلني, كتله صار حجي تدلل وظل يتشكر مني خطية.
وبعد دقايق من الكلام عن امورنه اللي بكل كعدة لازم نسولف بيها فاجأني بسؤال وكأن الحجي عنده فد سر خطير ومتردد يكولة أو لا؟
الحجي: أستاذ هم صحيح السيد علي السيستاني متوفي؟ وهذا اللي يطلع كاعد ويه الناس ابنه بس لابس القناع مال أبوه؟
هنا الصراحة آني بداخلي تحرك أو ثار مثل البركان من الغضب لكن متكدر اطلع هذا الغضب على رجال تفكيره على كد حالة ورجال جبير بالعمر بس حسيت انه الطريق رح يصير اطول من كل مرة ولازم اقنع هذا الرجال بفكرة حقيقية يكدر هو يستوعبها ومن ينقلها يكون هو المسيطر.
فكلت خلي اسولف وياه سوالف مال اهلنه فكتله حجينا هم تعرف شكد مواليد السيد؟ هنا الحجي حسيته استحى وجاوب بابتسامة حلوة وخفيفة وكلي لا وية بوية ما اعرف شكد مواليدة ليش اكذب عليك, كتله العفو حجي مو قصدي هذا بس حبيت استفسر.
رجعت سألته كتله بوية هم عدكم واحد بالعائلة او اقارب من قريب حته لو من بعيد او من العشيرة شيخ شي جبير كلش بالعمر يعني يطلع عمره فوك ال90 سنة؟ فكلي اي بوية اعرفلي شكم واحد بس هي الناس تسولف.
ابتسمت بوجهه وكتله حجينا يكولون حبل الجذب كصير! كلي شلون؟ كتله بسيطة كلش ماكو ابسط منها تركب سيارة تروح للنجف تزور امير المؤمنين سلام الله عليه وتدعيلي دعوة حلوة مثل وجهك بالتوفيق وتسأل الخدام كلهم وين بيت السيد السيستاني ( الله يحفظه) راح يدلوك تتمشالك خمس دقايق عن الصحن بشارع الرسول تشوف دربونة واكفين براسها حرس اسألهم شلون ازور السيد رح يكلولك هو عندة فلان وفلان يوم يقابل الناس وبلكي يدخلوك من يشوفوك رجال جبير بالعمر!
هنا اني افتريت على الحجي مثل خالد ابن الوليد من افتر عالمسلمين بمعركة احد! شفت الحجي داخ بهذا الجواب بعدين دار وجهه عليه وهو مستغرب وكلي عجيب! يعني بعده عايش؟ وراها الحجي سكت واني هم سكتت لان صراحة هذا السؤال ضوجني وصراحة ضجت عالحجي لان سؤاله هذا يوضح تفكيره البسيط وهاي مشكلة بس بداخلي اكو معارك طاحنه من الافكار والكلام ما اكدر اطلعها اكراما لشيبة الحجي وعمره.
هل فكرنا بأنفسنا كم قناع نلبس؟
فكرت احنه نفسنه شكم قناع لابسين واحنه ما ندري؟ تجامل فلان وعلان وتمدح مدير الدائرة الكذا وتذم مسؤول الدائرة الكذا وتصفك للنائب الكذا وتدافع على الموضف او الصديق الكذا!!
زين شكم اشاعة طلعت واتروجت وصارت حقيقة ويمكن ناس خسرت أزواحها او ناس خربت سمعتهم او موظف خسر وظيفته بسببها وهي مصدرها والله "الناس تحجي" و "سمعت من فلان شخص" و "الناس تسولف"!!
قريب ما نوصل للمنطقة اللي كلي عليها صراحة أخذني الفضول اعرف الحجي شنو خلفيته العلمية لان ظلت بنفسي فكتله حجينه انت هم دارس شي مخلص مدرسة؟ وإذا بهذا الحجي يصدمني صدمة العمر اللي ما جنت متخيلها وكلي وهو مبتسم وواثق من نفسه: إي نعم مخلص آني أستاذ بالإعلام... دكتور ....بروفيسور!!! بهاللحضة كلي زحمتك أستاذ راح انزل هنا بلا زحمة كتله لا العفو دكتور فرصة سعيدة ونزل وسد الباب.
هنا حسيت ظل ش واكف عالطريق! بس مو الحجي أو بالأحرى (الدكتور... البروفيسور) بس حسيت السؤال ظل واكف, زين إذا كلام الناس أو "الناس تسولف" هاي العبارة المستفزة كدرت تقنع أستاذ دكتور بالإعلام اللي هو يدرس الإشاعة وشلون تاخذ المعلومة من مكانها الصحيح اقتنع بسوالف الناس لعد هاي الناس البسيطة شلون؟
من الذي سيكشف الحقيقة؟
زين منو اللي راح يكشف للناس البسيطة حقيقة هذا الادعاء الباطل؟
لا ومن تروح للنجف تريد تلتقي السيد علي السيستاني (الله يحفظة ويطول بعمره) وتحصل على تكت او شنو تريد تسميها سميها راح تشوف السيد محمد رضا السيستاني (الله يحفظة) واكف باب البيت يستقبل الناس بنفسه!! والفيديو التمثيلي البائس يلبس القناع بغرفة الاستقبال! زين ليش ما يلبس القناع جوه بداخل البيت ويطلع للعالم؟
من جنت صغير جان عدنه جهاز فيديو وكاسيتات واحد من هاي الكاسيتات مسرحية الخيط والعصفور وبيها مشاهد من أمثال عراقية وسمعت المقدم يكول: أبو المثل ما خله شي ما كاله والمثل يكول "العقل زينة مو جراغون" وصاحبنه الحجي طلع بروفيسور وسلامتكم...
يسعدني ويشرفني متابعتكم لي على صفحتي الشخصية على الفيسبوك ومشاركة تعليقاتكم وآراءكم حول المقالات وما يتم نشره من منشورات تعبر عن الواقع الحالي ووجهة نظري الشخصية.
#السيستاني #السيد_السيستاني #سيد_علي_السيستاني #سيد_محمد_رضا_السيستاني #قناع_السيد_السيستاني #اعلام #بروفيسور #اشاعة #الناس_تسولف #جهل
تعليقات
إرسال تعليق