نهرين بلا ماء!!

أين ذهب الماء؟

الكل يسأل وين راح الماي؟ وليش دجلة والفرات وصل منسوبهم لمرحلة تكدر تعبرهم مشي؟

طبعا لو تسأل أي واحد بالحكومة العراقية الموقرة اللي اجت عن طريق الكتلة الأكبر بالبرلمان واللي هي اجت من الانتخابات الديمقراطية اللي شارك بيها الشعب بكل أديانه وقومياته ومذاهبه.

الجواب للسؤال السابق أكيد رح يكون هاي الأزمة صارت بسبب الدول اللي ينبع منها نهر دجلة ومثل ما نعرف نهر دجله ينبع من تركيا وخلي نصير شوية فطاحل بالجغرافية ونكول نهر دجلة ينبع من جبال طوروس جنوب شرق الأناضول بتركيا.

طول نهر دجلة الحزين تقريبا 1700 كيلومتر يمر بتركيا وبعدين يروح يسلم على سوريا بين الحدود العراقية السورية طاب طالع يعني يدخل لسوريا لمسافة 50 كيلومتر ويطلع منها يغني "استعجلت الرحيل" ويدخل للعراق وهو فاتح ايده ويكول افييييش هنا رح ارتاح!!.

من يدخل للعراق رح يشتاق لأصدقاء قديمين فيشيل سماعة التليفون ويتصل على أصدقائه وأولهم "نهر الخابور" ها حبيبي شلونك ان شاء بخير خوية مشتاقلك كلش هواي تعال يمي سير وهو هم ما يرد واحد كبل لم چوالاته وكله جايك من شرناق التركية بس رح افوت على كردستان لان سمعت بيها حلوة وصاحبنه يكوله كل الهلا بيك تنور منين ما اجيت.

بعدين تذكر يعرف اخوة اثنين اسمهم "الزاب الچبير والزاب الصغير" وهم ما چذب خبر شيل التليفون ابو القرص واتصل عليهم شاله الزاب الچبير كله بعد روحي دجلة شلونك وين گضة بيك الوكت؟ صاحبنه كلة حبيبي الغالي اني هسه بالعراق وصاحبنه نهر خابور هم اجاني وعايش بكردستان!.

الزاب هنا ضرب صفنه وحسبها حساب عرب گلك الخابور هذا ملعب وميفوت فوته اذا ميحسبها صح فلگله خوية اني لعد هم جايك بس رح افوت على دهوك لان احب المصايف والمناظر الطبيعية وصاحبنه گله خير ما اختاريت هلا بيك باي وقت بس جيب اخوك وياك! هنا الزاب الچبير جر حسرة وكله اخوية طلع هجرة وعايش هسه بايران بس رح اخابره بلكي يقتنع ويجي.

هنا الزاب الچبير خابر اخوه الزاب الصغير وگله خوية خابرني دجله وهسه هو مستقر بالعراق ومرتاح يكول ليش ما تجي يمنه ولام كل ربعنه وانته هنا حال الضيم حالك ليش ما تجي؟ سكت الزاب الصغير وكال لاخوه الجبير خوية اني شغلتي ما محسومه هنا ما ادري ابقى لو لا بس اذا اريد اجي خو ما اتورط فبشره اخوه الچبير وكله لا خوية ما تتورط بس للامان تعال على كركوك حته تصير قريب شوكت ما شفت الامور تعبانة ارجع وهنا الزاب الصغير اقتنع.

دجله هنا لم ربعه وفرحان ومرتاح بحياته بس فكر وكال بعد صديقي نهر ديالى هم بايران ليش ما احچي وياه واجيبة يمر على نهر العظيم وهمه ولد منطقة وتنلم الشلة التعبانة كلها والجماعة هم ما گالوا لا كلمن خلة جنطته فوك ظهره وانجمعوا ويه دجله والامور صارت كبة لوز.

بواحد من الايام من جانوا الشلة كلهم مجتمعين ومسوين مشاوي مرتبة اتذكروا دجله اله اخو فكلوله يابه انته جمعتنه وجبتنه من باقي الدول لعد اخوك وين؟ شو لا حس ولا خبر؟ كلهم هم چان ساكن تركيا وسكن فترة بسوريا وهسه اجه للعراق بس گلي خلينه بعيدين ونتلاگه بالجنوب اروح الي والك.

ما هي حقيقة شحة المياه في العراق؟ 

لهنا كلنا عرفنه دجله والفرات منبعهم الاساسي من تركيا وارمينا والنهرين يدخلون بسوريا بس الفارق انه دجله يجي ويه الحدود والفرات يدخل وسط سوريا بس الاهم هو المنبع وبنسبة 80% تقريبا و20% تقريبا من ارمينيا هسه هاي النسب تزود او تنقص مو بالشي المهم بس الاهم النسبة الاكبر هي بكل تأكيد لتركيا.

هنا تركيا شنو سوت حته تحافظ على الماي لاكبر مسافة داخل اراضيها وتستفاد منها اكبر استفادة ممكنة؟ كالت بما انه الماي ديروح مباشرة من المنبع گبل للخليج اللي هو مايه مالح, فانه ليش ما نسوي سدود على هذا النهر ونستفاد هم بالري رح يوصل الماي لاكبر مناطق ممكن يوصلها وهم نستفاد منها بتوليد الطاقة والاكثر من هذا ممكن نستغلها ملف نخلي بايدنا شوكت ما عجبنه نضغط بي على العراقيين!.

وفعلا بدت تركيا تسوي سدود على نهر دجله لا واحد ولا اثنين بس الهدف هو يبنون 22 سد على هذا النهر واخر واحد كلنه نعرفه وصار حديث الساعة هو سد اليسو اللي كمل وصار باتم الجاهزية بالـ2020 ويعتبر هو السادس او السابع وحسب متكول تركيا الغرض منه هو توليد الطاقة والسيطرة على الفيضانات.

هنا اي واحد بينه يكدر يسأل هذا السؤال وهو: ايران شنو دورها؟ ايران منبع من عدهم رافد واحد من اصل خمسه روافد وايران حاليا عدهم ازمة ماء حالهم حالنه لان الانهر الداخله لايران هم تنبع من غير دول وشي جدا طبيعي بلد يحاول بكل الطرق الممكنه يفيد شعبه وحكومتهم عدها الخط الاول هو الشعب عكس حكومتنا الموقرة اللي عدهم الشعب هو الخط الاخير.

هل أنتم الحكومة التي كنا نحلم بها؟ 

احنا نگول اليوم صار النه اكثر من 20 سنة وبالتحديد 22 سنة من سقط النظام الفاسد العفن اللي جان مخلي العراق متأخر عشرات السنوات عن الدول المجاورة ليش ما حاولوا يبنون سدود؟ يعني بلد بي نهرين والزراعة بي شي كلش سهل وبي مناطق تعتمد على الماي بشكل كلش چبير وبلد عنده سياحة معتمدة على الماي بصورة مو طبيعية ليش همه خلوا اساس لدمار هاي الموارد وخلت الفلاح يترك مهنته ويترك گاعه ويترك حلاله وصرنة من بلد كان متوفر كلشي تشتهي تاكله الى بلد تروح يم البگال تگله شنو عندك شي عراقي يگلك كله مستورد!!.

تحولنه من نظام دكتاتوري الى نظام حرية وديمقراطية وانتخابات نزيهه واحزاب تتنافس غير حته تكون للدولة هيبه بين باقي الدول لو حته وين منروح ويعرفون بينه عراقيين نصير مكفخة لليسوه واللي ما يسوه.

هي هاي تاليتنا نروح نتفاوض على الماي مال أنهازنا ونطي مقابيلها نفط؟ لعد وين الحقوق وين القوانين وين الحصة المائية اللي لازم ناخذها من عيون الأتراك عصبن ما عليهم بس عرفوا الحكومة شكد ضعيفة وشكد الشعب ما عنده ثقة بيها فحالوا يستغلون الموقف والف عافية عليهم لان عرفوا يلعبون صح.

لو مجرد الحكومة والبرلمان يجتمعون ويطلعون بقانون ينهون بي كل تعامل سياحي چان أو تجاري أو امني واكولهم من اليوم 0 سائح يدخل لتركيا و0 منتج يدخل منكم للعراق وشكو شبر بالعراق ماخذي تطلعون منه ويتحرك الجيش بكل تشكيلاته ولو چان اكو ضرورة للحرب خلي تصير حرب بس لا حياة لمن تنادي...