تكسي بلي وما ادراك ما بلي
مرحبا اصدقائي شلونكم, ان شاء الله بخير والعراق بخير.
اليوم موقفنا وقصتنا هواي مارة على الناس وخصوصا سواق التكسي, لان همه الناس اللي يصعد وياهم كل فئات الشعب فقيرهم وزنكينهم ابيضهم واسودهم متعلمهم وبسيطهم.
مقدمة
اني واحد من الشياب اللي دخلوا بهالمرحلة من العمر وهمه بقمة شبابهم, ومن اكول بقمة شبابهم يعني شاب بعمر الثلاثين متزوج وعندة طفل واحد وعايش وية اهله, شاب بسيط وقته كله منطي للعائلة وللوالدين وللشغل والطلعة ويه اصدقائه حذفها من قاموسه بسنة الـ ٢٠١٥ من ودع حياة العزوبية.
ومثل كل عراقي ياخذ رأي زوجته من باب المرأة نصف المجتمع (جذب حته اذبها براسها من يصير شي) كتلها يابه ام فلانة شنو رايج رح اشتغل بالسيارة بذني برامج التكسيات احسن ما السيارة نايمة بالكراج, وهنا اكيد رح يطلع واحد بيكم (اذا طلع بعد الله اعلم) ويكول شو انت منا تكول ماعندي وقت وهسه تريد تشتغل تكسي شلون رتبتها, احجيها بكل صراحة كلنه سامعين بالمضغوط وكاتبكم هو المضغوط بشحمه ولحمه, ردت اسوي اي شي بس حته اطلع من هاي الدوامة اللي اني بيها واجبر نفسي اطلع واشوف واختلط بالعالم ومنها نطلع اللي قاسمه رب العالمين عسه شوية يشيل من المصرف, وأول ما فكرت بيها كانت شركة بلي لان الاهل دائما تطلب تكسي بلي تكول كلش مناسب ودائما جنت اسالها السيارات شلونها زينة لو تعبانة جانت تكول مو سوه مرة تجي سيارة زينة مرة تجي سيارة كلش تعبانة والكراوي جانت كلش تصدم مرات اظل افكر اكول هذا السايق شبي خبل يقبل هيج كراوي؟ طبعا مع كل احترامي للسواق بس جنت اشوفها كروة مو منطقية.
ليش بلي؟
بحثت بالفيسبوك عن تكسي بلي وطلعت الي صفحتهم الرسمية وبديت اتصفح منشوراتهم ومقاطع الفيديو وحملات الترويج القوية الهم وعلساس تربح بالشهر مليون وثمنمية شلون حسبوها ما اعرف لان راتب المعلم او المدرس اللي عنده خمسين سنة خدمة ميوصل هيج رقم وكلت هذا هو رح اصير من اصحاب الملايين والشدات والعقارات وجنت مقتنع حته بالثمنمية ومطيح المليون للشركة, المهم شفت انه طريقة التسجيل هي عن طريق الواتساب وبالفعل دخلت عالرقم وراسلتهم وجان صراح شي بسيط جدا خطوات ينطيك بيها شنو المطلوب ويحولك للخطوة اللي وراها, كولوا خلصت التسجيل وكتبولي رح نفعل الك الحساب بعد ٢٤ ساعة ونرسلك اشعار وبالفعل قبل اقل من ٢٤ ساعة تفعل الحساب واتصلوا عليه مرتين وكلوىلي مبروك كابتن اتفعل حسابك ومثل كل واحد ميعرف شنو السالفة فرحت عبالي مسوي انجاز بدون روح وتعال وجيب الاستنساخ ووقع التعهد ومدري شنو كلشي صار عالواتساب واكيد رادوا مستمسكاتي ومستمسكات السيارة بس القصد كلشي صار بدون ما اروح لمكتب او اراجع اي مكان بس الشي السلبي انه ماكو اي شي تعليمي دزوا اليه حته اعرف شلون استخدم التطبيق وشلون اتعامل ويه الطلبات.
بداية الرحلة الى الملايين!!
وره اسبوع تقريبا قررت ابلش ونزلت تطبيق حجي ويز وجهزت الانترنت والشحن مال الموبايل فول اكيد وتوكلت على الله وشغلت التطبيق, ومثل ما جنت متوقع, من تصير السالفة على ارض الواقع تكون اصعب من الفيديوات اللي شفتها على اليوتيوب بداية مجنت اعرف شلون اقبل الطلب بعدين طلع لازم اظل ضاغط على كلمة القبول كولوا هاي عرفناها. ورة متقبل الطلب لازم من توصل لموقع الشخص تضغط وصلت حته يروح اشعار اله انه انت وصلت وصاحبكم وصل لاول طلب وظل منتظر شوكت يطلع؟ لهناك دك التليفون رقم غريب كلت يا ستار استر طلع اللي طالبني هو اللي مخابرني كلي يابه شنو وصلت بعدك!! كتله خوية صارلي عشر دقايق منتظر بالشارع كلي لعد ما اجاني اشعار انت وصلت كتله والله ما اعرف اني بالباب كلي جايك.
وحته نسرع من الاحداث والموضوع ميصير طويل عليكم ما جنت اشتغل يومية لان تدرون اللي يشتغل تكسي لازم يعرف كل الاحياء والمكانات واني نص احياء محافظتي ما اعرف وين صايره وضعف الاحياء الموجوده صارت احياء جديدة وبكدها بعد ضعفين صارت احياء البستنة او (الزراعي) فجنت اعاني من هالسالفة وافوت بشوارع اني ما افوت بيها عادة لان طبعي اعتني بالسيارة الى ابعد الحدود وما افوت بشوارع بيها طسات ولا ادخل بشوارع تكون مزدحمة ولا حته مجرب المواقف اللي يصير بيها ابو التكسي وكلكم تعرفون انه البرامج تكدر تلغي الرحلة شوكت متحب وهنا الكابتن هو يوكع بيها, يعني وحدة من المرات قبلت طلب ورحتله وجانت المسافة تقريبا ٤ كيلو ومن وصلت بالضبط للنقطة اللي الشخص محددها جان يلغيها وبعدني حته ما ضاغط على وصلت نقطة الانطلاق, وحدة من المواقف قبلت طلب وجان بمنطقة شعبية وبساتين وجانوا نسوان من صعدن اطفالهم صعدوا على كشنات السيارة وجانت احذيتهم يكرم القارئ طين وساعتها صدك حسيت داسوا بكلبي بحيث كبل كتلهم انزلوا وصرت كلش عصبي, وطلبات المناطق البستنة اخليها بجفة وحد لان مناطق تعيسة وطسات وطين وفروع كلش ضيقة والزبون اله يريدك توكفله بالباب مره انطخت المراية الجانبية وطلعت من مكانها وهاي بيها رادار مال نقطة عمياء يعني معقدة وغالية بس الحمد لله مصار بيها شي ومرة انطخت الجنطة بس الحمد لله ما صار ضرر, مرة من المرات قبلت طلب لمرة جبيرة بالعمر وطلع تحديدها كله غلط بغلط والمكالمات اللي صرفتهم جانن اكثر من الكروة وهواي امور الزبون ما يحس بيها بس يعرف يطلب ولازم تجي لباب البيت ولازم سعر رخيص.
بداية المأساة
وره هالشهر بدت تصير تحديثات عالبرنامج وكامت تجيني مكافآت اذا اسويها ينطوني حافز مثلا اذا اخذ ٥ رحلات ينطوني ٧ الاف واذا اسوي ٧ رحلات ينطوني ١٢ الف بس من جنت احسبها فلوس الكراوي وفلوس الحافز جان يطلع نفس الكراوي اللي ممكن تاخذهم من الشارع بس بلي سوت هالشي حته ترغب الكباتن بالتسجيل وبالشغل وجان اكو مكافأة ٢٥ الف همه يكلولك من تسجل تربح ٢٥ الف بس شروطها لازم تحقق ١٠ رحلات خلال اول يومين من تاريخ تفعيل الحساب وهذا اللي وكعوا بي الكباتن لان جانوا يطالبون بهاي المكافأة وهو ميعرف شنو شروطها وراحت عليهم.
بعد هالفترة كلت خلي اجرب اشتغل عالمكافآت وجنت اطلع بكل حماس وعندي طاقة ايجابية لكن الكراوي التعيسة اللي توصل لحد ١٧٥٠ دينار اللي ابو التكتك ما يرضى بيها وهنا اني ما اريد اقلل من احترام ابو التكتك بس نقيس عليه لان وسيلة نقل سعرها مناسب وصغيرة وما تصرف بانزين مثل السيارة والكعدة مالتها كلش بسيطة مو مثل ما كاعد بسيارة ومشغل الك تدفئة لو تبريد, المهم اشتغلت عالمكافآت وكدرت احصل نص من مكافأتين وحدة ٧ الاف والثانية جانت ٨ الاف لكن من ارجع احسب فلوس المكافاة ويه فلوس الكراوي واطلع منها فلوس البانزين الصارفه الكاها اما خسارة او فرق بسيط جدا ما يسوه حته التعب وانت متحمل الناس والشوارع والازدحامات.
وحاليا الاحباط يقره ١٠٠٪ والتطبيق يمكن ما فاتحة صار اكثر من شهرين والكروب اضطريت اغلقة لان صار الكباتن تغلط على الزبائن وعلى اعراضهم وهمه ما الهم ذنب مجرد شي اقتصادي متاح كدامهم ليش ما يستغلوه؟
تقبل الطلبات اجباري
ونزلت هواي تحديثات بس كلها مو من جانب الكابتن من امثلتها كان عدد الرحلات مفتوح كدامك اي رحلة تناسبك تاخذها بعدها صار لازم تقبل رحلة اجباريا من اصل ٣٠ رحله تجيك اذا ما قبلت اي رحلة من الـ٣٠ رح يستبعدوك لمدة ١٠ دقايق وهسه التحديث صار لازم تقبل رحلة من اصل ٢٥ طلب يوصلك يعني مجبور تقبل رحلة قبل ما العداد يوصل ٢٥ واكو كباتن يقبلون اي رحله ويتصلون عالزبون ويعتذرون منه حته يلغيها وما يتم استبعادهم ١٠ دقايق.
شنو الي انت مستفاده؟
هنا اني احب اسولف ما بداخلي لان هي مثل الغصة لازم اطلعها من تشوف او جنت اقرا كباتن عنده سيارة اوباما مثل منكول احنه (كرايسلر سي ٣٠٠) وجارجر وحته جالنجر زين ذني سيارات مو مال شغل تكسي داخل محافظة بتفاليس وهسه اجت سيارات الهايبرد مثل الكورولا الصيني والكورولا كروس والسيارات العالية مثل الدورنكو والجورني والسبورتج والتوسان هذني سيارات مو كل واحد يكدر يشتريهم لان اسعارهم عاليه اريد اعرف بشنو يفكرون من يشتغلون بيها تكسي؟ رح تجمع ثروة من الكراوي ام ١٧٥٠ و٢٥٠٠؟ لو رح اطلع فلوس سيارتك؟ زين هل من المعقول تويوتا كامري ٢٠٢٥ تشتغل بيها بتطبيق تعبان مثل بلي وبكراوي خلي نكول اعلاها بـ٥ الاف دينار وانت بس مجرد شخط بسيط اذا انشخطت راح تخلي ١٠ اضعاف هذا المبلغ!! وهذا الشي اني شفته بعيني حته لا تكولون هذا يبالغ.
ما اعرف شنو اللي يخلي هاي الناس اللي عدها احدث السيارات تشتغل بهيج شركة تعيسة من كل النواحي الله شاهد على كل كلمة اكتبها وما بيوم انتقصت من شي اذا مجان حقيقي ١٠٠٪ شركة بلي شركة تعبانة الى ابعد الحدود تشتغل بيها احدث السيارات وهمه مركز الدعم مالتهم مستند على بوت ذكاء اصطناعي واذا انت تريد تحجي ويه موظف لازم تنتظر اقل شي نص ساعه وماعدهم اتصال مباشر يعني اي مشكلة تصير او اي عارض لازم انت تحله بطريقك!!
شكد بحثت وحاولت اوصل لنتيجة هالشركة شنو ترتيبها شنو تاريخها ليش هيج الكراوي رخيصة بشكل ابد مو طبيعي ما طلعت راس خيط ويا كابتن هسه تلزمه تكله شلونها شركة بلي رح تسمع اعذب الحان السب والشتم وهو عنده احدث موديل سيارة ومسجل بهاي الشركة التعيسة ويقبل طلبات ممكن يوصل سعرها للنص والشركة باعلاناتهم الرخيصة وبكل وقاحة يكلولك زود دخلك وخلي يوصل ١,٨٠٠,٠٠٠ شلون حسبوها مدا استوعب الحكومة وين نايمة عنهم هم متعرف ويبقى الكابتن هو الضحية والسلام.
تعليقات
إرسال تعليق